Семінар «Музейная педагогіка: праекты, спецыфіка, вопыт» прайшоў у Нацыянальным гісторыка-культурным музеі-запаведніку «Нясвіж». У мерапрыемстве ўдзельнічалі прадстаўнікі вядучых дзяржаўных музеяў краіны. У якасці гасцей прысутнічалі выкладчыкі Нясвіжскага дзяржаўнага каледжа імя Якуба Коласа.

Яшчэ на стадыі падрыхтоўкі да семінара было вырашана адмовіцца ад абмеркавання шматлікіх тэарэтычных пытанняў і засяродзіцца на абмене практычным вопытам. Тут сапраўды ёсць чым падзяліцца. Разнастайныя формы інтэрактыўнай работы сталі неад’емнай часткай дзейнасці музеяў. Іх тэматыка вызначаецца перш за ўсё профілем установы.

Так, у Дзяржаўным музеі гісторыі беларускай літаратуры праводзяцца заняткі «Загадкі дзеда Кандрата» (паводле твораў Кандрата Крапівы), «Азбука гарадоў» (паводле кнігі Уладзіміра Ліпскага), «Нізка беларускіх казак». Вялікую цікавасць у дзяцей выклікаюць сустрэчы з пісьменнікамі.

Адукацыйныя праграмы Дзяржаўнага літаратурнага музея Янкі Купалы звязаны з творамі класіка і эпізодамі яго біяграфіі. У прыватнасці, падчас мерапрыемства «Калядкі ў Купалавым доме» можна не толькі павадзіць карагоды з казой ды адгадаць загадкі Снягурачкі, але і даведацца пра пераклад вядомай навагодняй песні «В лесу родилась ёлочка» – «Узышла ў лесе елачка», які зрабіў Янка Купала.

Супрацоўнікі замкавага комплексу «Мір» падзяліліся асаблівасцямі правядзення заняткаў «Таямніцы кафляных люстэркаў», на якіх дзеці могуць самастойна вырабіць і расфарбаваць кафляныя пласціны, а таксама расказалі пра сямейны квест «Легенды і паданні Мірскага замка».

У Беларускім дзяржаўным музеі народнай архітэктуры і побыту, што недалёка ад Мінска, можна паўдзельнічаць у святкаванні Каляд, Масленіцы, гукання вясны і інш. Тут наведвальнікаў чакаюць і персанажы беларускай міфалогіі, у якіх пераўвасабляюцца супрацоўнікі музея.

Цікавыя метады знаёмства з калекцыяй археалогіі выкарыстоўваюць у музеі Гомельскага палацава-паркавага ансамбля (у яго фондах знаходзіцца адна з самых вялікіх археалагічных калекцый нашай краіны – звыш 100 тыс. прадметаў). Пачынаючы з 2016 г. кожнае лета, у чэрвені, дзейнічае праект «Лета ў археалогіі», разлічаны на школьнікаў 6–14 гадоў.

Заняткі ў Нацыянальным мастацкім музеі прадказальна звязаны з творамі мастацтва. Так, асобныя заняткі раскрываюць сакрэты вядомай карціны В. Волкава «Мінск. 3 ліпеня 1944 года». На іх можна не толькі даведацца пра гісторыю легендарнага твора, але і паспрабаваць узнавіць біяграфіі яго персанажаў. А праграма «Каляднымі сцежкамі» дае магчымасць азнаёміцца з асаблівасцямі святкавання Каляд і Новага года ў акружэнні партрэтаў магнатаў і старадаўніх абразоў.

Супрацоўнікі музея-запаведніка «Нясвіж» таксама падзяліліся вопытам правядзення экскурсій для дзяцей і падлеткаў, расказалі пра гульні-экскурсіі, якія ствараюцца пад найбольш значныя выставачныя праекты, і прапанавалі выканаць некаторыя іх заданні. Таксама ўвазе гасцей была прадстаўлена новая метадычная распрацоўка, якая дазваляе сямейным групам самастойна знаёміцца з экспазіцыяй Нясвіжскай ратушы. І на завяршэнне мерапрыемства ўдзельнікі прайшлі квест «Карта сямі каралеўстваў». На працягу 40 хвілін каманды настойліва шукалі адказы на пытанні, каб атрымаць у якасці ўзнагароды фрагменты старадаўняй карты. Для гэтага ім прыйшлося не толькі праявіць назіральнасць, кемлівасць і эрудыцыю, але і ў літаральным сэнсе пабегаць: давялося і падымацца на гарышча ратушы і спускацца ў яе падвал.

На семінары быў узняты шэраг актуальных пытанняў. Як знайсці баланс паміж забаўляльнай і адукацыйнай функцыямі музеяў? Як зрабіць так, каб беларускасць у музейнай дзейнасці не асацыіравалася толькі з фальклорам і архаікай? Як наладзіць эфектыўнае супрацоўніцтва музеяў з установамі адукацыі?

Галоўным вынікам семінара стала рашэнне праводзіць такія сустрэчы рэгулярна з большым ухілам на практычную частку. Было выказана пажаданне запрашаць да ўдзелу ў падобных мерапрыемствах прадстаўнікоў школ, ліцэяў, гімназій, што дазволіць выпрацаваць больш эфектыўную сістэму супрацоўніцтва паміж дзвюма сферамі.

Андрэй БЛІНЕЦ,
вучоны сакратар музея-запаведніка «Нясвіж»
Фота з архіва арганізатараў і ўдзельнікаў семінара

Крыніца: «Настаўніцкая газета»

«Народная асвета» рекомендует:

Спадчына, або Каб не стаць манкуртам. Абразкі з жыцця нашых продкаў

М. А. Маляўка

У кніжцы расказваецца, як жылі нашы продкі, чым яны займаліся, якімі рэчамі гаспадарчага і хатняга ўжытку карысталіся, якую спадчыну пакінулі нам, сваім нашчадкам. Абразкі з жыцця старой вёскі перасыпаны паэтычнымі радкамі, сур’ёзнымі і вясёлымі гісторыямі, народнымі прыкметамі і парадамі, прыказкамі і прымаўкамі, загадкамі. Аўтар падрыхтаваў для чытачоў заданні: трэба адказаць на пытанні, так ці іначай звязаныя з вясковай сядзібаю, лёсам яе гаспадароў, іх буднямі і святамі.

2-е выданне, перапрацаванае

25 руб.

Да родных вытокаў. У дапамогу краязнаўцу

 С. Б. Холеў

У кнізе раскрываюцца асноўныя напрамкі і віды краязнаўства і змяшчаюцца матэрыялы аб спосабах арганізацыі краязнаўчай работы з навучэнцамі ва ўмовах сучаснага адукацыйнага працэсу. Падрабязна апісваецца методыка правядзення разнастайных краязнаўчых даследаванняў, накіраваных на ўсебаковае вывучэнне мясцовасці, даюцца рэкамендацыі па практычным прымяненні вынікаў праведзенай краязнаўчай работы.
Адрасуецца выкладчыкам устаноў агульнай сярэдняй адукацыі і дадатковай адукацыі дзяцей і моладзі, студэнтам педагагічных спецыяльнасцей вышэйшых навучальных устаноў, краязнаўцам-аматарам.

13.66 руб.